International
ట్రూడో సమక్షంలో ‘ఖలిస్థానీ’ నినాదాలు.. కెనడా రాయబారికి భారత్ సమన్లు
కెనడా ప్రధాన మంత్రి జస్టిన్ ట్రూడో సమక్షంలో ఖలిస్థానీ అనుకూల నినాదాలు చేయడాన్ని భారత్ తీవ్రంగా స్పందించింది. దీనిపై భారత్‌లోని కెనడా రాయబారికి కేంద్ర ప్రభుత్వం సోమవారం సమన్లు జారీచేసింది. ఇటువంటి చర్యలు ఇరు దేశాల మధ్య సంబంధాలపై తీవ్ర ప్రభావం చూపుతాయని, హింసను ప్రోత్సహిస్తాయని భారత్ గుర్తుచేసింది. ‘ఈవెంట్‌లో అనుమతించినఇటువంటి అవాంతర చర్యలపై భారత ప్రభుత్వం తీవ్ర ఆందోళన, నిరసన తెలియజేస్తోంది.. వేర్పాటువాదం, తీవ్రవాదం, హింసకు దారితీసే ఇది కెనడాలో రాజకీయ రంగాన్ని మరోసారి వివరిస్తుంది.. ఇటువంటి చర్యలు కేవలం భారత్- కెనడా సంబంధాలను ప్రభావితం చేయడమే కాదు తన సొంత పౌరులకు హాని కలిగించే హింస, నేరపూరిత వాతావరణాన్ని ప్రోత్సహిస్తాయి’ అని కేంద్ర విదేశాంగ మంత్రిత్వ శాఖ ఓ ప్రకటనలో తెలిపింది.
రెండు రోజుల కిందట టొరంటోలో జరిగిన ‘ఖల్సా’ దినోత్సవాలకు కెనడా ప్రధాని జస్టిన్ ట్రూడో, ప్రతిపక్ష నేతలు కూడా హాజరయ్యారు. ఈ సందర్భంగా సిక్కు సమాజాన్ని ఉద్దేశించి ట్రూడో ప్రసంగిస్తుండగా కొందరు ఖలిస్థానీ మద్దతుదారులు నినాదాలు చేశారు. ప్రధాని మాట్లాడుతుండగా ‘ఖలిస్థానీ జిందాబాద్‌’ అని అరుస్తున్న దృశ్యాలు సోషల్ మీడియాలో వైరల్‌గా మారాయి. అయితే, వారిని పట్టించుకోకుండా ట్రూడో తన ప్రసంగాన్ని కొనసాగించారు. ‘సిక్కుల హక్కులు, స్వేచ్ఛను మేం ఎల్లప్పుడూ రక్షిస్తాం.. స్వదేశంలోని మీ కుటుంబసభ్యులను కలిసేందుకు వీలుగా భారత్, కెనడా మధ్య విమాన రాకపోకలను మరింత పెంచడానికి కృషి చేస్తాం’ అని ప్రధాని ఈ సందర్భంగా వెల్లడించారు.
కాగా, గతేడాది జూన్‌లో జరిగిన ఖలిస్థానీ ఉగ్రవాది హర్‌దీప్‌ సింగ్‌ నిజ్జర్‌ హత్య వెనుక భారత ఏజెంట్ల పాత్రపై తమకు సమాచారం ఉందంటూ పార్లమెంట్‌లో ట్రూడో చేసిన ప్రకటనతో ఇరు దేశాల మధ్య దౌత్య సంబంధాలు దెబ్బతిన్నాయి. ఈ ఆరోపణలను భారత్ తీవ్రంగా ఖండించింది. భారత దౌత్యవేత్తను కెనడా బహిష్కరించగా.. దీనికి భారత్ తీవ్రంగా స్పందించింది. భారత్‌లోని కెనడా రాయబారిని తక్షణమే తమ దేశం విడిచి వెళ్లాలని ఆదేశించింది. అలాగే, మరో 41 మంది దౌత్య సిబ్బందిని కెనడా వెనక్కి తీసుకుంది. ఖలీస్థానీ ఉగ్రవాదులకు కెనడా ఆశ్రయం కల్పిస్తోందని భారత్ ఆరోపణలు చేస్తోంది.
ఈ క్రమంలోనే ఇటీవల ఒట్టావాలోని భారత హైకమిషనర్‌ సంజయ్‌ కుమార్‌ వర్మను లక్ష్యంగా చేసుకుని కొందరు ఖలిస్థానీ మద్దతుదారులు.. భారత వ్యతిరేక నినాదాలు చేయడం కలకలం రేపింది. ఇక, గతేడాది సెప్టెంబరులో ఢిల్లీ వేదికగా జరిగిన జీ 20 దేశాల కూటమి సమావేశానికి వచ్చిన సమయంలో ఇదే అంశాన్ని ప్రస్తావించే ప్రయత్నం చేశారు.