వణికిస్తున్న టోర్నడోలు.. ప్రమాదంలో 3.4 కోట్ల మంది ప్రజలు

అమెరికాలో టోర్నడోలు బీభత్సం సృష్టిస్తున్నాయి. వివిధ రాష్ట్రాలపై విరుచుకుపడుతున్న టోర్నడోలతో అక్కడి ప్రజలు తీవ్ర భయాందోళనకు గురి అవుతున్నారు. ఈ క్రమంలోనే సోషల్ మీడియాలో టోర్నడోలకు సంబంధించిన వీడియోలను షేర్ చేస్తూ.. అక్కడి పరిస్థితిని ప్రపంచానికి తెలియజేస్తున్నారు. మరీ ముఖ్యంగా టెక్సాస్ రాష్ట్రంపై ఈ టోర్నడోల ప్రభావం అధికంగా ఉంది. టెక్సాస్ రాష్ట్రంలోని టెంపుల్ నగరంలో ఏర్పడిన ఓ భారీ టోర్నడోకు సంబంధించిన వీడియో ప్రస్తుతం సోషల్ మీడియాలో తెగ వైరల్ అవుతోంది.

బుధవారం రోజున టెంపుల్ నగరంలో ఓ భారీ టోర్నడో ఏర్పడింది. ఆ టోర్నడో ఆగ్నేయం వైపు కదులుతున్నట్లు కనిపించింది. దీంతో ఆ ప్రాంతంలో వాతావరణం తీవ్ర అల్లకల్లోలంగా ఉందని అధికారులు వెల్లడించారు. మరిన్ని టోర్నడోలు ఏర్పడటంతోపాటు గంటకు 80 మీటర్ల వేగంతో గాలులు వీస్తాయని అంచనా వేశారు. బెల్టన్, సలాడో, లోట్, రోజ్‌బడ్ ప్రాంతాల్లో ఈ టోర్నడోల బీభత్సం అధికంగా ఉంటుందని పేర్కొన్నారు. ఇక టెక్సాస్ రాష్ట్రంలోని వివిధ ప్రాంతాలకు కూడా నేషనల్ వెదర్ సర్వీస్.. కొన్ని హెచ్చరికలు చేసింది.

మరిన్ని టోర్నడోలు టెక్సాస్ రాష్ట్రంపై విరుచుకుపడే అవకాశం ఉందని నేషనల్ వెదర్ సర్వీస్ తెలిపింది. ఇక టెక్సాస్‌లోని టెంపుల్ నగరంలో సుమారు లక్ష మంది ప్రజలు జీవిస్తున్నట్లు తెలుస్తోంది. ఈ క్రమంలోనే నేషనల్ వెదర్ సర్వీస్.. టెక్సాస్ నుంచి న్యూయార్క్ వరకు ఉన్న రాష్ట్రాలకు లెవల్-2 తుఫాన్ హెచ్చరికలు చేసింది.

టెక్సాస్, అర్కన్సాస్, ఓక్లహోమా, టెన్నెస్సీ, కాన్సాస్, నెబ్రస్కా, పెన్సిల్వేనియా, మేరీల్యాండ్, కెంటకీ, వెస్ట్ వర్జీనియా, వర్జీనియా, న్యూయార్క్ రాష్ట్రాల్లు తుఫాన్లు వచ్చే అవకాశాలు ఉన్నాయని వెల్లడించింది. ఈ రాష్ట్రాల్లో సుమారు 3.4 కోట్ల మంది ప్రజలు ఈ లెవల్ 2 తుఫాను కారణంగా ముప్పులో ఉన్నట్లు తెలిపింది.

ఓస్వెగో, న్యూయార్క్, జెనీవా, ఫల్టన్ వంటి రాష్ట్రాలకు నేషనల్ వెదర్ సర్వీస్ తీవ్ర తుఫాను హెచ్చరికలు చేసింది. ఈ రాష్ట్రాల్లో ఉన్న ప్రజలు అప్రమత్తంగా ఉండాలని సూచించింది. బలమైన గాలులు, భారీ వర్షం, వడగళ్ల వాన వంటి భీకర వాతావరణ పరిస్థితులను తట్టుకునేందుకు సిద్ధంగా ఉండాలని పేర్కొంది.