మెక్సికో అధ్యక్ష పీఠంపై తొలిసారిగా మహిళ- దేశాధ్య‌క్షురాలిగా షీన్‌బామ్‌ రికార్డ్ – Mexico Election 2024

Mexico Election 2024 Results : మెక్సికోకు మెదటి సారిగా ఓ మహిళ అధ్యక్షురాలుగా ఎన్నికై కొత్త చరిత్ర సృష్టించారు. దాదాపు 200 ఏళ్ల చరిత్రలో దేశానికి తొలిసారి ఓ మహిళ అధ్యక్షురాలిగా వ్యవహరించనున్నారు. ఆదివారం జరిగిన ఎన్నికల్లో క్లాడియా షీన్‌బామ్‌ ఘన విజయం సాధించారు. ప్ర‌స్తుతం ఉన్న దేశాధ్య‌క్షుడు ఆండ్రెస్ మాన్యువ‌ల్ లోపేజ్ ఒబ్రాడ‌ర్ స్థానంలో షీన్‌బామ్ బాధ్య‌త‌లు చేప‌ట్ట‌నున్నారు. అక్టోబ‌ర్ ఒక‌టో తేదీన దేశాధ్య‌క్షురాలుగా కొత్త బాధ్య‌త‌ల‌ను స్వీక‌రించనున్నారు. ఎగ్జిట్​ పోల్స్ అంచనాలు కూడా షీన్​బామ్​ గెలుస్తారని, 50-60 శాతం ఓట్లు వస్తాయని అంచనా వేశాయి.

దేశ ప్రజలను ఎట్టి పరిస్థితుల్లోనూ నిరాశ పరచనని కొత్తగా ఎన్నికైనా మెక్సికో అధ్యక్షురాలు షీన్​బామ్​ అన్నారు. లోపేజ్​ ప్రారంభించిన అభివృద్ధి పనులు కొనసాగిస్తామని తెలిపారు. ఓ మహిళ మెక్సికోకు అధ్యక్షురాలిగా ఎన్నికవ్వడం తన జీవితంతో మరిచిపోలేని క్షణాలని ప్రత్యర్థి అభ్యర్థి గాల్వేజ్ అన్నారు. ప్రస్తుతం దేశాధ్యక్షుడిగా ఉన్న లోపేజ్​ కూడా క్లాడియా షీన్​బామ్​ను అభినందించారు. తన కంటే ఎక్కువ మెజారిటీతో గెలుపొందడం సంతోషంగా ఉందని తెలిపారు.

క్లాడియా షీన్​బామ్​ ఎవరు?
క్లాడియా 1962 జూన్​ 24న మెక్సికోలో జన్మించారు. షీన్​బామ్​ కుటుంబం బల్గేరియా నుంచి మెక్సికోకు వచ్చి స్థిరపడింది. నేషనల్ అటానమస్ యూనివర్శిటీ ఆఫ్​ మెక్సికో నుంచి ఎనర్జీ ఇంజనీరింగ్ విభాగంలో పీహెచ్​డీ చేశారు. క్లాడియా ఒక శాస్త్రవేత్త. కాలిఫోర్నియాలోని ఓ ల్యాబ్​లో మెక్సికో ఇంధన వినియోగంపై పరిశోధనలు చేశారు. శాస్త్రవేత్తగా కేరీర్​ ప్రారంభించిన ఆమె ఆ తర్వాత 2018లో రాజకీయాల్లోకి వచ్చారు. ఆ సంవత్సరంలో సిటీ మేయర్​గా బాధ్యతలు చేపట్టారు. అప్పుడు ఆ పదవికి ఎన్నికైన మొదటి మహిళగా చరిత్ర సృష్టించారు. కొవిడ్​ సమయంలో వైరస్​ వ్యాప్తి చెందకుండా పరిమితులను విధించారు. అలాగే పర్యావరణపై ప్రత్యేక శ్రద్ధ చూపించారు. మెక్సికో నగర ప్రజల జీవన నాణ్యతను మెరుగుపరిచే విధంగా అనేక కార్యక్రమాలు చేపట్టారు. క్లాడియా షీన్​బామ్ నాయకత్వ సామర్థ్యాలు, చేపట్టిన కార్యక్రమాలు లాంటి వాటికి ప్రజలు ఆకర్షితులయ్యారని, అందుకే దేశ అధ్యక్షురాలిగా ఎన్నుకున్నారని విశ్లేషకులు చెబుతున్నారు.