Paris Olympics 2024 Live Telecast : పారిస్ వేదికగా ఒలింపిక్ క్రీడా సంబరాలు నేడు (జులై 26) అట్టహాసంగా ప్రారంభం కానుంది. ఇప్పటికే పలు ఈవెంట్లు కూడా ప్రారంభం కాగా, అఫీషియల్ ఓపెనింగ్ సెరిమనీతో మిగతా ఈవెంట్లు కూడా గ్రాండ్​గా మొదలవ్వనుంది. మరీ ఈ విశ్వ క్రీడల ప్రారంభ వేడుకను ఎప్పుడు ఎలా చూడొచ్చంటే?

జియో సినిమా, స్పోర్ట్స్18 నెట్‌వర్క్, లాంటి సంస్థలు ఈ వేడుకలను లైవ్​ టెలికాస్ట్ చేయనున్నాయి. భారత కాలమానం ప్రకారం ఈ ప్రారంభోత్సవ వేడుకలు రాత్రి 11 నుంచి టెలికాస్ట్ కానుంది. ఇక అథ్లెట్ల పరేడ్ పడవల్లో ఉంటుంది. ఇందులో సుమారు 94 పడవల్లో ప్లేయర్లు పయనిస్తారు.

ఇక ఈ పరేడ్​లో గ్రీస్ ముందు వరసలో ఉండగా, ఆ తర్వాత ఆల్ఫాబెట్ వరుస క్రమంలో ఆయా దేశాల ప్రతినిథ్లు అనుసరిస్తారు. అయితే ఆతిథ్య దేశ జాతీయ భాషను ప్రామాణికంగా తీసుకోవడం వల్ల ఆతిథ్య దేశం పరేడ్‌ చివరిలో వస్తుంది. ఇక అంతకంటే ముందు వరుసలో రానున్న ఒలింపిక్స్‌కు ఆతిథ్యం ఇచ్చేందుకు సిద్ధంగా ఉన్న దేశాలు ఉంటాయి. ఈ లెక్కన 203లో ఆస్ట్రేలియా (2032 ఒలింపిక్స్), 204లో అమెరికా (2028 ఒలింపిక్స్), 205లో ఫ్రాన్స్ (2024 ఒలింపిక్స్) వస్తాయి.

మరోవైపు ఈ పరేడ్​లో భారత్ 84వ స్థానంలో రానుంది. ఇక ఈ ప్రారంభ వేడుకల్లో భారత స్టార్ షట్లర్ పీవీ సింధు ఫ్లాగ్ బేరర్‌గా వ్యవహరించనున్నారు. తనతో పాటు టేబుల్ టెన్నిస్ ప్లేయర్ శరత్ కమల్‌ మన త్రివర్ణ పతాకాన్ని పట్టుకొని భారత అథ్లెట్ల బృందాన్ని ముందుండి నడిపించనున్నారు.

దాదాపు 10వేల 500 మంది అథ్లెట్లు ఈసారి విశ్వక్రీడల్లో ఆడుతున్నారు. ప్రపంచవ్యాప్తంగా షార్ట్‌ వీడియోల ట్రెండ్‌ నడుస్తున్న వేళ యువతరం కోసం ప్రత్యేక వేదికలు సిద్ధమయ్యాయి. ఉగ్రదాడులు, గాజా ఉక్రెయిన్‌ యుద్ధాలను దృష్టిలో ఉంచుకుని భద్రతను ఫ్రాన్స్‌ ప్రభుత్వం పటిష్టం చేసింది.

పారిస్‌కు 150 కిలోమీటర్ల విస్తీర్ణంలోని ప్రదేశాన్ని నోఫ్లై జోన్‌గా ప్రకటించారు. ఫ్రాన్స్‌ అతి పెద్ద స్టేడియమైన స్టేడ్‌డి ఫ్రాన్స్‌ను 2015లో ముష్కరులు లక్ష్యంగా చేసుకోవడంతో ఈసారి ప్రారంభోత్సవాలను అందులో నిర్వహించట్లేదు. ఎక్కడికక్కడ కృత్రిమ మేధతో కూడిన నిఘా వ్యవస్థను నెలకొల్పారు. 45వేలమంది పోలీసులు, 10 వేలమంది సైనికులు పారిస్‌కు పహారా కాస్తున్నారు.

124 ఏళ్ల క్రితం ఇదే పారిస్‌లో జరిగిన ఒలింపిక్స్‌లో 22 మంది మహిళలే ఆడగా, ఈసారి పాల్గొంటున్న క్రీడాకారుల్లో స్త్రీ పురుషుల సంఖ్య దాదాపు సమానంగా ఉంది. ‘మీ టూ’ ఉద్యమం తర్వాత జరుగుతున్న తొలి ఒలింపిక్స్‌ ఇవి. వాతావరణ పరిరక్షణకు కట్టుబడి తక్కువ కాలుష్యంలో విశ్వక్రీడలను నిర్వహించాలని ఫ్రాన్స్‌ భావిస్తోంది.

Korean Countries Balloons War : ఉత్తర, దక్షిణ కొరియా దేశాల మధ్య చెత్త బెలూన్ల యుద్ధం మరింత ముదిరింది. ఉత్తర కొరియా మళ్లీ పంపిన చెత్త బెలూన్లు సౌత్ కొరియా అధ్యక్ష కార్యాలయం ప్రాగణంలో పడ్డాయని ఆ దేశ మీడియా సంస్థ పేర్కొంది. బుధవారం ఉదయం ఉత్తర కొరియా, బెలూన్లు ప్రయోగించినట్లు దక్షిణ కొరియా సైన్యం తెలిపింది. అవి సరిహద్దు దాటిన తర్వాత సియోల్​కు ఉత్తరంగా ఎగిరాయని పేర్కొంది. బెలూన్ల నుంచి పడే వస్తువుల పట్ల ప్రజలు అప్రమత్తంగా ఉండాలని సూచించింది. అయితే ఈ ‘చెత్త’ దాడిలో ఎలాంటి నష్టం జరగలేదని దక్షిణ కొరియా తెలిపింది.

మే నెల చివరి వారం నుంచి ఈ బెలూన్ల యుద్ధం రెండు దేశాల మధ్య సాగుతోంది. ఉత్తర కొరియా ఇలా బెలూన్లు పంపడం ఇది పదో సారి అని దక్షిణ కొరియా సైన్యం చెప్పింది. ఇప్పటి వరకు 2,000 కంటె ఎక్కువగానే బెలూన్లను ప్రయోగించినట్లు తెలిపింది. ఆ బెలూన్లలో ఎరువులు, సిగరెట్ పీకలు, చెత్త వస్తువులు, వ్యర్థాలు ఉన్నాయని వెల్లడించింది. అయితే దక్షిణకొరియా పంపిన బెలూన్లకు ప్రతీకారంగానే చెత్త బెలూన్లను పంపడం మళ్లీ ప్రారంభించామని ఉత్తర కొరియా పేర్కొంది.

లౌడ్​స్పీకర్లతో సమాధానం
కొత్త కొరియా చెత్త బెలూన్లకు గతంలో దక్షిణ కొరియా గట్టి జవాబునిచ్చింది. సరిహద్దుల్లో పెద్ద పెద్ద లౌడ్‌స్పీకర్లను ఏర్పాటు చేసి ఉత్తర కొరియా వ్యతిరేక ప్రచారాలను ప్రారంభించింది. సైనిక స్థావరాలు ఉన్న ఉత్తర కొరియా ప్రాంతాల్లో లౌడ్‌ స్పీకర్ల ద్వారా K-పాప్ సంగీతం, విదేశీ వార్తలతోపాటు, ప్యాంగ్యాంగ్ వ్యతిరేక ప్రసారాలను దక్షిణ కొరియా సైన్యం హోరెత్తిస్తోంది. ఉత్తర కొరియాలో విదేశీ వార్తలు, K-పాప్‌ సంగీత శ్రవనాన్ని తీవ్ర నేరాలుగా పరిగణిస్తారు. అవి తమ పౌర సమాజంలో ప్రభుత్వ వ్యతిరేక భావాలను నాటుతుందని, తన అధికారాన్ని బలహీనపరుస్తుందని నియంత కిమ్‌ జోంగ్‌ ఉన్‌ భావిస్తారు. 2015లో ఇలాగే దక్షిణ కొరియా లౌడ్‌ స్పీకర్లతో ఉత్తర కొరియా వ్యతిరేక ప్రచారం చేయగా ప్రతిచర్యగా కిమ్‌ ప్రభుత్వం ఫిరంగులను పేల్చింది. అప్పట్లో అది ఉద్రిక్త పరిస్థితులకు తావిచ్చింది. మళ్లీ ఆ పరిస్థితులే ఎదురైతే ఎదుర్కొనేందుకు సంసిద్ధంగా ఉండాలని దక్షిణ కొరియా రక్షణ మంత్రి సైనిక బలగాలను ఆదేశించారు.

Philippines Mall: మాల్‌లో వీధి పిల్లికి సెక్యూరిటీ గార్డ్ జాబ్ వచ్చింది. మనుషులైనా తమ ఉద్యోగంలో అలసట, బద్ధకం ప్రదర్శిస్తారేమోగానీ ఈ పిల్లి మాత్రం విధుల్లో ఏ మాత్రం అలసత్వం ప్రదర్శించకుండా చేస్తోంది. ఫిలిప్పీన్స్‌లో ఆ పిల్లి విధులు నిర్వహిస్తున్న వీడియో సామాజిక మాధ్యమాల్లో విపరీతంగా వైరల్ అవుతోంది.

మాండలుయోంగ్ మెట్రో మనీలాలోని మాల్‌లో మెగావరల్డ్ కార్పొరేట్ సెంటర్ ఈ పిల్లిని సెక్యూరిటీ జాబ్ లో నియమించింది. ఆల్ డే సూపర్ మార్కెట్లోని గేట్ వద్ద ఈ పిల్లి ఉంటుంది. కోనన్ బ్యాగ్‌లను తనిఖీ చేయడంలో ఈ పిల్లి సాయపడుతుంది. అంతేగాక, ఎవరైనా మాల్‌కి పెంపుడు జంతువులను తెచ్చుకుంటే వాటిని కూడా స్వాగతిస్తుంది.

View this post on Instagram

A post shared by Almost (@almost.co)

ఇంతకీ ఈ పిల్లి వయసు ఎంతో తెలుసా? కేవలం ఆరు నెలలు మాత్రమే. ఆ మాల్‌లో పనిచేసే సెక్యూరిటీ సిబ్బందిలో ఈ పిల్లి భాగమైపోయింది. సెక్యూరిటీ సిబ్బంది ఒత్తిడిని కూడా ఈ పిల్లి తగ్గిస్తోంది. ఈ పిల్లిని సెక్యూరిటీ గార్డ్ కోనన్ అని పిలుస్తారు. ఈ పిల్లి పనితీరును చూసి ఇతర మాల్స్ కూడా పిల్లులను పనిలో పెట్టుకోవాలని యోచిస్తున్నాయి.