Maldives: మాల్దీవులు జలాల్లోకి చైనా పరిశోధక నౌక.. భారత పోర్టులు, అణు కేంద్రాలపై నిఘా!

Maldives: ఓ వైపు భారత్‌తో దౌత్యపరంగా వివాదం కొనసాగుతున్న వేళ.. చైనా, మాల్దీవులు దోస్తీ రోజు రోజుకూ పెరగడం తీవ్ర చర్చనీయాంశంగా మారింది. చైనాతో ఒప్పందాలు, చైనా మద్దతుతో విర్రవీగుతున్న మాల్దీవులు అధ్యక్షుడు మహ్మద్ ముయిజ్జూ.. జిన్‌పింగ్‌కు పూర్తిగా సహకారం అందిస్తున్నారు. ఈ క్రమంలోనే తమ దేశ భూభాగంపై ఏ దేశ సైనికులు ఉండకూడదని పేర్కొంటూ భారత సైన్యాన్ని వెనక్కి పంపించిన మాల్దీవులు.. చైనా విషయంలో మాత్రం ఆ వైఖరిని అనుసరించడం లేదు. ఈ క్రమంలోనే తాజాగా మాల్దీవులు సముద్ర జలాల్లోకి చైనా పరిశోధక నౌక ప్రవేశించడం తీవ్ర చర్చకు దారి తీస్తోంది. చైనాకు చెందిన రీసెర్చ్ షిప్ షియాంగ్‌ యాంగ్‌ హాంగ్‌-03.. గురువారం ఉదయం తిలాఫుషీ ఇండస్ట్రియల్‌ హార్బర్‌లో లంగర్ వేసినట్లు స్థానిక మీడియా వెల్లడించింది. అయితే ఈ షియాంగ్‌ యాంగ్‌ హాంగ్‌-03 నౌక ఎందుకు తిరిగొచ్చింది అనే విషయాన్ని మాల్దీవులు సర్కారు వెల్లడించలేదు.

భారత్‌తో మాల్దీవులకు దౌత్యపరంగా తీవ్ర వివాదం కొనసాగిస్తున్న వేళ.. ఇటీవల చైనాకు చెందిన పరిశోధక నౌక కొన్నిరోజుల పాటు మాల్దీవుల జలాల్లో తిష్ట వేసింది. ఆ తర్వాత అది చైనాకు వెళ్లిపోగా.. తాజాగా మరోసారి మాల్దీవుల జలాల్లోకి ప్రవేశించడం తీవ్ర చర్చకు దారి తీస్తోంది. దాదాపు 4500 టన్నుల బరువు ఉన్న ఈ షియాంగ్‌ యాంగ్‌ హాంగ్‌-03 నౌక.. ఈ ఏడాది జనవరిలో చైనాలోని సన్యా నుంచి బయల్దేరింది. మాల్దీవుల ఎక్స్‌క్లూజివ్‌ ఎకనామిక్‌ జోన్‌ సరిహద్దుల్లో నెల రోజుల పాటు తిరిగిన ఈ రీసెర్చ్ షిప్.. ఫిబ్రవరి 23 వ తేదీన తిలాఫుషీ పోర్టుకు చేరుకుంది. అక్కడ వారం రోజుల పాటు ఉన్న ఆ నౌక.. తర్వాత తిరిగి వెళ్లింది.

ఇది జరిగిన దాదాపు 2 నెలల పాటు వివిధ పోర్టులకు వెళ్లిన ఈ షియాంగ్‌ యాంగ్‌ హాంగ్‌-03.. ప్రస్తుతం మళ్లీ మాల్దీవులుకు చేరుకుంది. అయితే ఈ నౌక మాలె తీరానికి చేరుకున్న విషయాన్ని మాల్దీవుల విదేశాంగ శాఖ మంత్రి వెల్లడించారు. సిబ్బంది రొటేషన్‌ కోసం చైనా ప్రభుత్వం నుంచి దౌత్యపరమైన అభ్యర్థన వచ్చిన మేరకు ఆ నౌకను తమ జలాల్లోకి అనుమతించినట్లు తెలిపారు. అయితే ఆ నౌక మాల్దీవులు జలాల్లో ఉన్నప్పుడు ఎలాంటి పరిశోధన కార్యకలాపాలు నిర్వహించదని పేర్కొన్నారు.