ITR Filing: ఐటీఆర్ ఫైల్ చేస్తున్నారా? ఈ 8 తప్పులు చేయొద్దు.. చిక్కుల్లో పడతారు!

ITR Filing: ఆదాయపు పరిధిలోకి వచ్చే వారు ప్రతి ఏడాది జులై 31వ తేదీ లోపు తమ రిటర్నులు దాఖలు చేయాలి. అయితే ఐటీ రిటర్నులు ఫైల్ చేయడం అంత సులభమైన పనేం కాదు. చాలా అప్రమత్తంగా ఉండాలి. ఎలాంటి తప్పులు లేకుండా జాగ్రత్తగా ఫైల్ చేయాల్సి ఉంటుంది. లేదంటే తర్వాత నోటీసులు అందుకోవాల్సి వస్తుంది. నిపుణుల సలహాలు, సూచనలు పాటిస్తూ ఫైల్ చేయడం ద్వారా పొరపాట్లు దొర్లకుండా చూసుకోవచ్చు. సాధారణంగా ఐటీఆర్ దాఖలు చేసే సమయంలో పన్ను చెల్లింపుదారులు ఎలాంటి తప్పులు చేస్తుంటారో ఇప్పుడు మనం తెలుసుకుందాం.

ఐటీఆర్ ఫామ్ ఎంపిక..
ఐటీఆర్ ఫైలింగ్ కోసం మీకు ఏ ఫామ్ వర్తిస్తుందో దానినే ఎంపిక చేసుకోవాలి. చాలా మంది ఈ అంశంలో పొరపాట్లు చేస్తారు. సరైన ఫారాన్ని ఎంపికు చేసుకోవాలని చార్టర్డ్ అకౌంటెంట్స్ ట్యాక్స్ పేయర్స్ కు సూచిస్తుంటారు. తప్పుడు ఫారం సమర్పిస్తే ఆ తర్వాత ప్రాసెసింగ్ ఆలస్యం అయ్యే అవకాశం ఉంటుంది.

ఫ్యూచర్ అండ్ ఆప్షన్స్ ట్రాన్సాక్షన్లు
స్టాక్ మార్కెట్లలో ఫ్యూచర్ అండ్ ఆప్షన్స్ ట్రాన్సాక్షన్లు చాలా క్లిష్టంగా ఉంటాయి. ట్యాక్స్ అంశంలో ఇవి మరింత కాంప్లికేటెడ్ అని చెప్పొచ్చు. అందుకే ఎఫ్ అండ్ ఓ ట్రాన్సాక్షన్లను ప్రాఫిట్ అండ్ లాస్ తో సహా సరిగ్గా వెల్లడించాల్సి ఉంటుంది. సరిగ్గా చేయకపోతే ఐటీ శాఖ నుంచి నోటీసులు రావొచ్చు.

విరాళాలు
ఆదాయపు పన్న చట్టం 1961లోని సెక్షన్ 80సీ కింద విరాళాలకు పన్ను మినహాయింపులు క్లెయిమ్ చేసుకోవచ్చు. అయితే వాటికి కచ్చితమైన ఆధారాలు ఉండాలి. ఆధారాలు ఉన్నప్పుడే క్లెయిమ్ చేసుకోవాలని పన్ను నిపుణులు సూచిస్తున్నారు. ఐటీ మినహాయింపు ఉన్న చారీటీలు, సంస్థలకు విరాళాలు ఇచ్చిన సందర్భంలోనే బెనిఫిట్స్ క్లెయిమ్ చేసుకోవచ్చు. వారి నుంచి రషీదులు కూడా కచ్చితంగా తీసుకోవాలి.

ఎంప్లాయి స్టాక్ ఓనర్ షిప్ ప్లాన్స్
కొన్ని కార్పొరేట్ కంపెనీలు తమ ఉద్యోగులకు షేర్లు రూపంలో వేతనాలు చెల్లిస్తుంటాయి. లేదా వాటా ఇస్తుంటాయి. వీటినే ఎంప్లాయి స్టాక్ ఓనర్ షిప్ ప్లాన్స్ అంటారు. ఈ కోవకు వచ్చే ఉద్యోగులు నిబంధనలను సరిగ్గా తెలుసుకుని ఐటీ రిటర్న్స్ లో వివరాలు పొందుపర్చాల్సి ఉంటుంది. షేర్ల విలువ, ట్యాక్స్ టైమింగ్ తెలుసుకోవాలి. నిపుణల సలహా తీసుకుని ఫైలింగ్ చేయడం మంచిది.

ఉద్యోగం మారినప్పుడు..
కొందరు ఒకే సంవత్సరంలో రెండు మూడు కంపెనీలు మారుతుంటారు. ఇలాంటి వారు పాత కంపెనీలోని శాలరీ, ప్రస్తుతం కంపెనీ వేతనాల వివరాలను సరిగ్గా లెక్కలేసుకుని సమర్పించాల్సి ఉంటుంది. లేకుంటే ట్యాక్స్ ఫారాల్లో తప్పుడు వివరాలు నమోదవుతాయి. అందుకే పాత, కొత్త కంపెనీల్లో జీతాలు, బోనస్, ఇతర ప్రోత్సాహకాల వివరాలను చెక్ చేసుకోవాలని నిపుణులు సూచిస్తున్నారు.

క్రిప్టో కరెన్సీ, కాయిన్స్
క్రిప్టో కరెన్సీపై ట్యాక్స్ విధించడంలో భారత్ సహా చాలా దేశాలు కచ్చితమైన విధానాన్ని పాటించడం లేదు. అందుకే బిట్ కాయిన్ వంటి క్రిప్టో కరెన్సీలో ఇన్వెస్ట్ చేసే వారు ప్రాఫిట్, లాస్ వివరాలు చూసుకుని ఐటీ రిటర్న్స్ దాఖలు చేయాలి. పన్ను అవసరాలకు అనుగుణంగా లావాదేవీలు ఉండేలా చూసుకోవాలి.

వడ్డీ ఆదాయంపై టీడీఎస్
వివిధ పొదుపు పథకాలు, పెట్టుబడుల ద్వారా వచ్చే వడ్డీ ఆదాయంపై టీడీఎస్ ఉంటుందని చాలా మంది ట్యాక్స్ పేయర్లకు అవగాహన ఉండదు. ఫిక్స్‌డ్ డిపాజిట్లు, పొదుపు ఖాతాల ద్వారా వచ్చే ఆదాయ వివరాలను ఐటీఆర్ వెల్లడించాల్సిన అవసరు లేదు. టీడీఎస్ సర్టిఫికేట్ ఫారం 26ఏఎస్ తో సరిచేయాలి. నికర పన్ను విధంచదగినదానికి వడ్డీ ఆదాయాన్ని మాత్రమే నివేదించాల్సి ఉంటుంది.

ల్యాండ్ లేదా ప్రాపర్టీ కొనుగోలు
దీర్ఘకాల పేమెంట్ ప్లాన్ల ద్వారా కొనుగోలు చేసిన ల్యాండ్ లేదా ప్రాపర్టీలకు క్యాపిటల్ గెయిన్ ట్యాక్స్ చెల్లించాలి. వీటికి కూడా ఏమైనా మినహాయింపులు ఉంటే తెలుసుకోవాలి. ట్యాక్స్ నిపుణుల సలహా తీసుకోవాలి.