China Teen Zhou Chuna : అభిమాన నటిలా కనిపించాలని 100కు పైగా ప్లాస్టిక్ సర్జరీలు.. రూ.4 కోట్లు ఖర్చు పెట్టిన యువతి

China Teen Zhou Chuna : చైనాలోని 18 ఏళ్ల యువతి తన అభిమాన నటిగా కనిపించడం కోసం 100 కన్నా ఎక్కువ ప్లాస్టిక్ సర్జరీలను చేయించుకుంది. ఈ సర్జరీల కోసం దాదాపు 563వేల డాలర్లు (భారత కరెన్సీలో రూ. 4 కోట్లకు పైగా) ఖర్చు చేసింది.

సౌత్ చైనా మార్నింగ్ పోస్ట్ (SCMP) ప్రకారం.. తూర్పు చైనాలోని జెజియాంగ్ ప్రావిన్స్‌కు చెందిన ఝౌ చునా.. 13 ఏళ్ల వయస్సులో ప్లాస్టిక్ సర్జరీ చేయించుకోవాలని నిర్ణయించుకుంది. తనకు ఎంతో ఇష్టమైన చైనీస్ నటి ఎస్తేర్ యు అందాన్ని ఎలాగైనా పొందాలని భావించింది. కొన్ని ఏళ్లుగా తల్లిదండ్రుల దగ్గర నుంచి 4 మిలియన్ యువాన్ల కన్నా ఎక్కువ డబ్బులు తీసుకుని మరి 100 ప్లాస్టిక్ సర్జరీల కోసం ఖర్చు చేసింది.

తన రూపం తనకు నచ్చలేదని :
ఆమె చిన్నతనం నుంచే చునా తన రూపాన్ని ఇష్టపడేది కాదు. తాను అందంగా లేనని ఆందోళన, నిరాశతో జీవించేది. ఆమె అందంగా కనిపించడం లేదని బంధువులు, కుటుంబ స్నేహితులు చెప్పినప్పుడు చాలా ఇబ్బందిగా ఫీలయ్యేది. షాంఘైలోని అంతర్జాతీయ పాఠశాలలో చదవినప్పుడు తన సహవిద్యార్థులు అందంగా ఉండటం చూసి తాను కూడా వారిలానే ఉండాలని భావించింది. అప్పటినుంచి ఆత్మన్యూనతాభావం, అసూయ ఆమెలో పెరిగాయి. అవే తన రూపాన్ని మార్చుకోనేలా ప్రేరేపించాయి.

అప్పుడే యువతి చునాకి ప్లాస్టిక్ సర్జరీ చేయించుకోవాలనే ఆలోచన పుట్టింది. అలా చిన్న వయస్సులో ప్లాస్టిక్ సర్జరీ ప్రయాణం ప్రారంభమైందని నివేదిక వెల్లడించింది. మొదటి ఆపరేషన్‌లో డబుల్ కనురెప్పల సర్జరీకి ఆమె తల్లి అనుమతించింది. అప్పటినుంచి యువతి తన రూపాన్ని మార్చుకోవడంలో నిమగ్నమైపోయింది. ఇతర వైద్య విధానాల కోసం తన చదువును కూడా పక్కన పెట్టేసింది.

సర్జరీలతో ఇబ్బందిపడినా ప్రయత్నాలు ఆపలేదు :
ఔట్‌లెట్ మీడియాతో మాట్లాడుతూ.. ‘నేను దాదాపు అన్ని ప్లాస్టిక్ సర్జరీలు చేయించుకున్నాను. అందులో రినోప్లాస్టీ, బోన్ షేవింగ్ వంటివి ఉన్నాయి’ అని ఆమె చెప్పింది. 10 సర్జరీల వరకుభరించినప్పటికీ ఆమె కళ్ళు పెద్దవి చేయడానికి ఇకపై ఎలాంటి సర్జరీలు వద్దని ఆమె వైద్యులు హెచ్చరించారు. కానీ, ఆమె వాటిని విస్మరించింది. అత్యంత బాధాకరమైన శస్త్రచికిత్స బోన్ షేవింగ్ చేయించుకున్నానని చైనా యువతి వెల్లడించింది. 10 గంటల పాటు సాగిన ఈ సర్జరీ కారణంగా 15 రోజుల పాటు మంచానికే పరిమితం అయింది. అయినా కొంచెం కూడా భయపడకుండా అలాంటి సర్జరీలను మళ్లీ చేయించుకుంటూనే వచ్చానని చెప్పుకొచ్చింది.

వైద్యులు వద్దని వారించినా వినలేదు :
చునాకు రెండో ఆపరేషన్ చేసేందుకు ఏ వైద్యుడు సిద్ధంగా లేరు. ఇలా ప్రతిసారీ కొత్త వైద్యుడి కోసం వెతికినట్టు అవుట్‌లెట్ నివేదించింది. అలా 100కు పైగా ప్లాస్టిక్ సర్జరీలను పూర్తి చేసింది. ఇప్పుడు తన ముఖాన్ని ఎవరూ గుర్తించలేనంత మారిందని తెలిపింది. పాత స్నేహితులు నన్ను ఇప్పుడు గుర్తించడం లేదని చెప్పింది. తనకు ఇంకా స్టార్ కావాలనే తన కలను కోరిక మాత్రం అలానే ఉందని పేర్కొంది.

ఇప్పుడు, చునా తల్లి కుమార్తె అందం పట్ల వ్యామోహానికి సపోర్టు చేయడం మానేసింది. ఆమె తండ్రి కూడా ఆమె కొత్త రూపాన్ని అంగీకరించలేదు. వైద్యులు ఇంకా ప్లాస్టిక్ సర్జరీలు చేయించుకోవద్దని గట్టిగానే హెచ్చరించారు. ఎట్టకేలకు యువతి చునా సర్జరీ ప్రయత్నాలను విరమించుకున్నట్టు ప్రకటించింది.